Humbja historike ndaj Sheriff Tiraspol në Bernabeu nuk është katastrofë për Realin, sepse kualifikimi është ende plotësisht i arritshëm, por nga ana tjetër ka ekspozuar një seri problemesh për të cilat Carlo Ancelotti nuk po gjen zgjidhje, edhe pse po bën shumë eksperimente.
Trajneri italian ka provuar një revolucion që dështoi kundër Sheriff, duke bërë 4 zëvendësime në minutën e 65-të, me rezultatin 1-1, çka ia prishi ekuilibrat skuadrës, me Camavinga që përfundoi si mbrojtës i majtë, shkruan AS.
DETAJET NË MBROJTJE
Ancelotti kërkon më shumë intensitet dhe e ka përmendur shpesh këtë kërkesë, por në mbrojtje problemet mbeten të mëdha. Reali ka pësuar 10 gola, një më shumë se Reali i Zidane vjet në këtë pikë të sezonit. Barazimi ndaj Levantes ishte i dhimbshëm, sepse 3 golat e pësuar erdhën nga mungesa e balancës në mbrojtje. Edhe ndaj Celta ndodhi e njëjta gjë, por Reali fitoi 5-2 dhe gjithçka kaloi pa zhurmë.
Janë “detaje të vogla” që bëjnë diferencën, tha Ancelotti pas Sheriff, si në rastin e pozicionimit në golin e dytë, por detajet ende nuk po gjejnë zgjidhje, sidomos në Bernabeu.
FORMACIONI NDRYSHON ÇDO JAVË
Tifozët e Realit ende nuk e dinë cili është formacioni bazë për Ancelottin. Dëmtimet bëjnë të vetën, por edhe ndryshimet taktike kanë qenë të shpeshta dhe Reali në 9 ndeshje ka luajtur me 9 formacione të ndryshme. Ashtu si Zidane në fillim të sezonit të shkuar…
CARVAJAL, PA ZËVENDËS (ENDE)
Edhe pse Reali rinovoi me Lucas Vazquez, Ancelotti nuk e sheh fare dhe ka preferuar Nacho e Valverde në mungesë të Carvajal. Ky i fundit do kthehet në nëntor, duke shpresuar të mos dëmtohet më.
POZICIONI I HAZARD
Belgu e nisi sezonin si sulmues i majtë, me Bale djathtas, ndërsa kundër Sheriff luajti në të djathtë, kur u fut. Pozicioni i tij mbetet i paqartë, ashtu si vendi në hierarkinë e Realit. Përveç Benzema e Vinicius, askush në ekip nuk shënon dot rregullisht dhe nga Hazard pritej më shumë këtë sezon.
