Carlo Ancelotti është shfaqur sot para mediave, për të folur në prag të sfidës së të shtunës, në Bernabeu kundër Villarrealit. Në vijim deklaratat e tij…
ZËVENDËSUESIT: “Është një temë delikate, duhet ta administroj sa më mirë. Nëse lë pushim disa lojtarë dhe ata që luajnë paraqiten mirë, titullarët duhet t’i lësh në stol. Gjithsesi, në fund synimi është të hedhësh në fushë një ekip që mund të fitojë ndeshjen. Është normale që lojtarët që nuk kanë luajtur mund të luajnë në ndeshjen e radhës, sepse janë më të freskët”.
KALENDARI: “Në stërvitje duhet intensitet, është e ndërlikuar ta kesh këtë intensitet kur luan çdo 3 ditë. Përgatitim video, në mënyrë që lojtarët të shohin ku kanë bërë mirë dhe ku duhet të përmirësohen”.
MBROJTJA: “Është një aspekt që duhet ta përmirësojmë. Ka gjithnjë hapësirë për përmirësim. Kundër Mallorcas ishim më agresivë në sulm, plani është të vazhdojmë kështu, duke qenë më agresivë kur nuk kemi topin”.
NDESHJA KUNDËR VILLARREALIT: “Do të përballemi me një ekip shumë cilësor, që ka eksperiencë dhe organizim të mirë, luan në nivel të lartë. Do na pëlqente të bënim gjithçka mirë, sepse vetëm kështu mund ta mposhtim”.
ASENSIO: “Marco ishte i rëndësishëm para ndeshjes. Nëse nuk luan, kjo nuk do të thotë që nuk vlen. Ka treguar që mund të luajë në një pozicion të rëndësishëm, në zemër të fushës. Është shumë i rëndësishëm”.
SULMI: “Po bën mirë, duhet të jem i ndershëm. Në këtë moment jemi përqendruar shumë tek aspekti sulmues, sepse ai duhej përmirësuar. Kemi shumë cilësi përpara, lojtarët duhet të kenë sa më shumë kontakt me topin”.
ANCELOTTI NË MADRID: “Deri tani gjithçka mirë, kur të largohem të shohim çfarë do them (qesh)”.
BENZEMA DHE TOPI I ARTË: “Besoj se duhet të jetë në listën për Topin e Artë. Po ju them kaq: Karim ka ende kohë për ta fituar, nuk besoj që është sezoni i fundit për të. Është si vera, përmirësohet me kalimin e viteve”.
HAZARD: “Rëndësi ka që është stërvitur dhe nuk ka probleme. Është riaftësuar dhe ndihet mirë, edhe pse nuk ia garantoj dot që do luajë çdo ndeshje, askujt nuk ia garantoj. Duhet edhe pushim, Hazard e di mirë”.
KRIZA E BARCELONËS: “I shoh ndeshjet, më pëlqen futbolli. Nuk jam i kënaqur kur një ekip ka probleme. Shoh dhe vlerësoj atë që ndodh, por përqendrohem tek ekipi im. Nuk më bëhet qejfi për atë që po i ndodh Barcelonës, apo çdo ekipi kur ka vështirësi”.
NDRYSHIMI I FUTBOLLIT: “Evolucioni ka qenë fizikisht, më shumë sesa taktik apo teknik. Intensiteti është shumë më i lartë, luhet shumë pa top”.
ALABA: “Alaba është shumë i zoti kur ka topin, por nëse nuk e kemi, duhet të mbrojmë me bllok të ulët dhe atë po bëjmë. Do na pëlqente të luanim me linjën mbrojtëse në mesfushë, por nuk është e mundur”.
