Eder Militao u prezentua sot si lojtari më i ri i Real Madridit ndërsa përpara mediave ai përshkruajti veten si një lojtar polivalent dhe shumë kompetitiv me një dëshirë të lartë për të triumfuar me Madrilenët.
Braziliani ishte pjesë e kombëtares së Brazilit që triumfoi në Copa America ndërsa në Madrid vjen nga eksperienca shumë e suksesshme tek Porto. Të gjitha këto pritet t’i shfrytëzoje në maksimum Zinedine Zidane, që sheh shumë potencial tek mbrojtësi.
”Jam një lojtar polivalent që gjithmonë luan me një dashuri dhe pasion të veçantë për atë që bën,” filloi Militao.
”Nuk më pëlqen të humbas dhe gjithmonë pres më të mirën nga vetja. Jam shumë kompetitiv.”
Shumë tifozë Madrilen mbase nuk e kanë parë në aksion me Porton por mbrojtësi ka dhënë një premtim për atë se çfarë duhet të presim nga ai.
”Mund të prisni një lojtar shumë kompetitiv që do të jape gjithçka për këtë fanellë,” theksoi ai.
”Do të luaj çdo ndeshje sikur të ishte ndeshja ime e fundit.”
Teksa ishte tek Porto, Militao kishte në skuadër Iker Casillas dhe Pepe, dy legjenda të Real Madridit prej të cilëve ka mësuar për Madridin.
”Më kanë thënë që është një klub që ka qenë në gjendje të fitoje 4 Champions League në 5 vitet e fundit.”
”Më kanë folur për kulturën, punën ditore dhe më kanë këshilluar të jem i qetë dhe të punoj fort.”
Ndërsa sa i përket objektivave, qendërmbrojtësi nul dëshironte të shtoje presion mbi veten.
”Kam ardhur këtu për të bërë punën time,” theksoi Militao. ”Këmbët e mia janë në tokë, ndërsa Zidane është ai që ka fjalën e fundit.”
Por me insistimin e gazetarëve, ai zbuloi aspiratën që ka.
”Do më pëlqente të fitoja Champions Leaguen,” konfirmoi ai.
Militao iu bashkua Portos vetëm një vit më parë por ai bëri mjaftueshëm për të tërhequr interesimin e klubeve të mëdha Europiane teksa vlerësoi kohën e kaluar në qytetin Portugez.
”Ishte një vit shumë i mirë. Të gjithë më kanë pritur në mënyrën më të mirë të mundëshme. Të gjithë besonin tek unë dhe për këtë jam shumë mirënjohës për kohën e kaluar atje.”
”Jam shumë i lumtur që kisha një eksperiencë të tillë tek Porto.”
Tani, tek Real Madridi, pritshmëritë janë më të larta se tek Porto, veçanërisht në Europë.
”Gjërat kanë ndodhur shumë shpejtë në jetën time,” theksoi Militao.
”Falë Zotit kam ardhur në klubin më të mirë në botë. Jam shumë i lumtur që kam arritur këto objektiva. Nuk do të ndalem me kaq, sepse dua të vazhdoj të përmirësohem.”
