Zërave për transferimin e Paul Pogba tek Real Madridi i shtohen edhe deklaratat e Patrice Evra. Ish lojtari i Manchester United, deklaroi në një intervistë për ‘Sky Sports’ se Paul Pogba do të largohet nga Manchesteri këtë verë.
“Mendoj se Pogba do të largohet. Duhet ta ndjesh dashurinë kur luan futboll në një ekip dhe të ndihesh i vlerësuar. Tek Manchester United ka persona që nuk e duan, madje edhe tifozët e kanë vërshëllyer disa herë. Pogba është një lojtar i madh, një nga mesfushorët më të mirë në qarkullim dhe meriton të ketë mbështetjen dhe dashurinë e klubit dhe tifozëve.”
Këto deklarata vijnë pas një incidenti që pati Pogba me disa tifozë të Manchester United pas ndeshjes me Cardiff të cilët e fyen rëndë francezin.
Pas kësaj deklarate shtohen akoma më shumë zërat për transferimin e Pogba në Madrid. Ju kujtojmë që pak javë më parë ishte vetë Pogba që tha që do t’i pëlqente të luante në Madrid nën udhëheqjen e Zidane. Po ashtu edhe Zidane më pas deklaroi që Pogba është një lojtar që do donte t’a kishte në ekip.
