Real Madrid do të bëjë përforcime të mëdha verën e ardhshme, për të vijuar procesin e rinovimit të ekipit, që nisi verën që lamë pas. Për të përforcuar ekipin e drejtuar nga Ancelotti Florentino Perez ka si synime madhore Mbappe ose Haaland, ose të dy, por ndërkohë po shihen me vëmendje të madhe lojtarë shumë interesantë që dalin të lirë në treg verën e ardhshme, çka i bën mjaft tërheqës për shumë klube, por natyrisht Reali mbetet Real, çdo lojtar e ëndërron. Më poshtë një listë prej 7 emrash që me siguri do të përfundojnë në tryezën e drejtuesve të Realit, duke nisur nga 1 janari.
KYLIAN MBAPPÉ
Sulmuesi francez padyshim që është synimi madhor i Realit verën e ardhshme dhe tashmë është kthyer në lajm dite, pasi thuajse çdo ditë dalin lajme, që herë entuziazmojnë e herë shqetësojnë madrilenët. Ylli i Francës ka refuzuar çdo ofertë rinovimi nga PSG dhe e ka bërë të qartë që verën e shkuar donte patjetër vetëm Realin.
PAUL POGBA
Mesfushori i Francës përfundon kontratën me Man Utd verën e ardhshme. Ka një kosto shumë të madhe, përfaqësohet nga Mino Raiola dhe kjo gjë bezdis Realin, që ende po mendohet, aq më shumë që ka plot zgjedhje në qendër të fushës.
PAULO DYBALA
Argjentinasi ka klas dhe tashmë është në kulmin e karrierës, është momenti perfekt për të tentuar një aventurë larg Italisë. Vitet e fundit e kanë shqetësuar dëmtimet, por tek Reali, me lojën sulmuese që luajnë Los Blancos, mund të shpërthente.
FRANCK KESSIÉ
Mesfushori nga Bregu i Fildishtë nuk po rinovon me Milanin dhe kërkon 8 milionë euro neto në sezon, përveç komisioneve. Një tank i vërtetë në fushë, Reali mund të afrojë një lojtar që do të vlente shumë në aspëkt mbrojtës e sulmues.
MARCELO BROZOVIC
Mesfushori kroat ka një pagë të ulët tek Inter dhe tashmë kërkon të përfitojë, duke dalë i lirë në treg. E duan shumë klube, por një sinjal nga Reali do ta joshte, aq më shumë nëse i telefonon edhe Modric.
ANTONIO RÜDIGER
Qendërmbrojtësi i fuqishëm i kombëtares gjermane ka qenë lojtar kyç tek Chelsea sezonet e fundit, por tashmë kërkon një rritje të konsiderueshme page për të rinovuar. Këtu mund të përfitojë Reali, që ka një shans ideal për të përforcuar qendrën e mbrojtjes.
NIKLAS SÜLE
Nëse Rudiger rinovon me Chelsean, do ishte alternativë interesante Niklas Süle, qendërmbrojtës i Bayernit, ku nuk ka ndërmend të rinovojë dhe do të largohet falas verën e ardhshme.
