Real Madrid ka nisur me kohë punën për sezonin e ardhshëm dhe përveç sulmit, ku priten goditje të mëdha, synohet patjetër edhe një mbrojtës i djathtë, duke parë problemet e shumta fizike të Dani Carvajal.
Los Blancos kanë piketuar Trent Alexander-Arnold, duke iu referuar asaj që raportohet në Spanjë. Talent i madh, vetëm 22 vjeç, goxha eksperiencë dhe lojtar konstant në fazën mbrojtëse dhe atë sulmuese.
Liverpool nuk ka ndërmend ta lërë të lirë, aq më shumë që bëhet fjalë për një lojtar kyç dhe të rritur në Liverpool, por Daily Express në Angli raporton se The Reds po marrin masat në rast se vetë lojtari do kërkojë largim.
Kështu, The Reds duan një shifër të rëndësishme parash, por gjithashtu po studiojnë mundësinë e afrimit të ndonjë lojtari nga Reali. Emrat që mund të joshin Liverpool janë Lucas Vázquez, Isco, Asensio e Jovic. Të gjithë janë lojtarë që në Madrid nuk po luajnë rregullisht, por mund të vlenin shumë për Jurgen Klopp, edhe për faktin se janë të rinj dhe vlera e tyre mund të rritet ndjeshëm në të ardhmen, nëse gjejnë aktivizim dhe formë perfekte.
