Trajneri i Villarrealit, Unai Emery, ka folur në konferencë për shtyp dhe është ndalur gjatë tek Reali, në prag të ndeshjes së sotme.
“Reali ka pësuar 3 gola në 2 ndeshje dhe kjo duket si pika e dobët e tyre, por problemi është se shënojnë shumë më tepër dhe nuk e di sa vlere kanë statistikat. Duhet gjetur një ekuilibër perfekt. Duhet të jemi shumë të fortë në mbrojtje dhe nëse sulmojmë, sërish duhet të mendojmë që të mos lëmë hapësira pas.
“Benzema e Vinicius janë shumë të fortë, Modric e Valverde krijojnë shumë dhe kjo u jep rrezikshmëri të madhe.
“Edhe në mbrojtje janë shumë solidë, Militao është përmirësuar dukshëm 2 vitet e fundit dhe në portë kanë portierin më të mirë në botë, ose një ndër më të mirët.
“Benzema? Lojtar i madh, ka gjetur habitatin e vet, shënon dhe e bën ekipin të shënojë. Përfshihet shumë në lojën e Realit dhe duhet kujdes, sepse duhet mbuluar jo vetëm kur ka rast shënimi, por edhe kur ndërton lojën. Pastaj Reali nuk është vetëm Benzema, ka shumë alternativa cilësore edhe në stol, ndaj duhet ekuilibër”.
