Sergio Ramos u ndëshkua me karton të verdhë në ndeshjen e parë cerekfinale ndërmjet Juventusit dhe Real Madridit në Itali dhe kështu do të mungojë në ndeshjen kthyese në Bernabeu për shkak se këtë sezon ka dy kartona të verdhë në Champions League.
Duke e ditur edhe mungesën e Nachos për shkak të dëmtimit, mbrojtja e ekipit në ndeshjen kthyese ndaj Juventusit do të ketë mungesa dhe pritet që Zidane të shikojë për opsionin më të mirë të mbrojtjes.
Pa Ramos dhe pa Nachon ndaj Juventusit më 11 prill, partner i Raphael Varane në qendër të mbrojtjes pritet të jetë talenti Jesus Vallejo i cili këtë sezon ka pasur pak minuta në krahasim me mbrojtësit e tjerë.
Kjo ndoshta do të jetë java më e rëndësishme në karrierën e Vallejos. Ai ishte në stol në ndeshjen në Torino dhe pritet të startojë në Bernabeu.
